要阿叻下跪

陳百祥(阿叻)早前矢言，如果由網民發起的「萬千熄機賀台慶」能夠令TVB台慶節目收視跌剩2-3點，他願意由電視城跪住行路返屋企。此言一出，立即惹來更大迴響，更有另一批網民開Group，希望找出全港800個受調查公司委託安裝收視紀錄儀的家庭，一同於當晚熄機推低收視。(現行的收視調查，是根據調查公司於全港800個家庭安裝的收視紀錄儀所取得的觀看電視節目紀錄，推算出全港收視率。調查公司會事先徵詢被揀選家庭意願才進行安裝，而每次轉台或開電視，家庭成員都要用遙控器輸入紀錄。協助調查的家庭據知會有1000元超市禮券作獎勵。) 

行動甚有「大衛挑戰巨人」的意味，幾日之間已經獲得逾萬人讚好，到底行動的目的何在？我們訪問了這個群組的代表—

Q︰你哋係咩背景(年紀、職業)？同之前撐HKTV發牌嘅朋友有冇關係？因咩事要開呢個Group？
A︰我哋係膠登討論區嘅網民，只係一班互不相識嘅香港居民，沒有任何政治聯繫，但之前有出席撐HKTV發牌嘅集會。開呢個Group嘅原因當然係因為早前阿叻嘅言論，挑釁香港人，所以先有呢個回應。

Q︰行動目的係咪純粹係想阿叻下跪？
A︰行動目的不是純粹只係想阿叻下跪，可能有一些網民純粹只想睇戲，但我哋係想借呢個行動，向TVB表達我哋嘅不滿，同埋對冇電視選擇權嘅憤怒，我哋唔想再睇啲千篇一律嘅節目。

Q︰點睇阿叻嘅言行？
A︰阿叻嘅言行挑戰香港人底線之餘，更加反映咗TVB嘅高傲自大，以為觀眾冇咗佢哋就唔得。

Q︰而家搵到幾多個收視盒？估計11/19之前可以搵到幾多？
A︰暫時搵到大约五個盒，喺一星期內可以搵到幾多我哋都唔知，呢樣要睇大家為咗要阿叻找數可以去得幾盡。

Q︰搵到的話，會叫對方點做？
A︰搵到嘅話會盡力說服佢罷睇十九號晚嘅台慶show，但一切都會尊重對方意願。如果網友知道身邊朋友係用戶之一，可以約佢去街食飯，或者同佢講，熄機嘅話可以睇到比台慶更有娛樂性嘅嘢。

Q︰有冇同呢啲受訪戶接觸過？有冇得意發現？
A︰有，從中我哋知道好多有關收視統計嘅嘢，亦發現好多網友其實唔知收視率係點計出嚟。

Q︰驚唔驚TVB/調查公司有對策，或者搵你哋麻煩？
A︰非常害怕，我們尤其擔心同我們聯繫嘅用戶，所以同對方嘅對話、收集到嘅資料都絕對保密。

Q︰你哋自己本身睇唔睇TVB？TVB節目，喜歡 / 討厭？
A︰我本人不討厭，我只係想有個選擇權，a台做得好我可以轉睇b台，但而家我們冇得揀，只能揀熄機。

Q︰你會唔會睇台慶？
A︰堅決罷睇

Q︰有冇信心行動成功？
A︰要跌到2-3點太難，但若去到十零點都算十分成功。

Q︰如果阿叻唔找數會點？
A︰會有跟進行動