因為之前試過，鄭嘉穎、胡杏兒主演嘅《怒火街頭2》係沿用番第一集主題曲，故令網民都好期待，希望《衝上2》可以用番《歲月如歌》做主題曲。可惜，監製歐冠英同陳維冠已經回應咗讀者查詢，謂《衝上雲霄2》將不會用上一集的歌曲，今次係特別邀請林子祥唱主題曲，請觀眾密切期待。
林子祥過去唱過不少經典電視金曲，好似《真的漢子》(《當代男兒》萬梓良)、《抉擇》、《人海中一個你》、《改變常改變》(《大家族》)；電影金曲更加無數，唱功實力毋庸置疑，而且之前亦同過Eason同台開騷鬥長氣，勁到爆燈。
《衝上雲霄1》一切一切，包括Eason同Sam哥吳鎮宇交手呢一幕仍歷歷在目。不過《衝上2》主題曲就改由林子祥主唱喇。
同場加映:
還記得當年Eason都有客串過其中一集《衝上雲霄》？當時佢一落機，就遇到大批歌迷，同Sam哥(吳鎮宇)。咁啱當時Sam哥講緊電話，同對方講咗句﹕「幫我簽埋呀唔該」，Eason以為Sam都係索簽名，於是喺佢車窗上簽下大名，仲問Sam哥﹕「其實我都想問，喺你呢種長輩嚟講，點睇我嘅《明年今日》？」Sam哥嬲到七彩又不便發作，只可以話:「第一，我唔識算命，我唔知你明年今日會點；第二，我上年今日都冇入戲院睇過戲，我俾唔到意見你，唔好意思!」
