秋生bb論

日前擔任台慶頒獎嘉賓的黃秋生，在台上搞氣氛笑指人稱「嘉欣BB」的鍾嘉欣：「幾廿歲仲叫BB！」不料惹來嘉欣的粉絲在微博鬧爆。秋生昨日在微博致歉並留言說：「若鍾嘉欣有不快我願意道歉，若只是你們不快，我亦願意道歉，你們寫要說甚麼？我在後面簽名！」
至於嘉欣接受本報記者訪問時，表示從沒怪秋生：「根本冇放喺心，BB呢個暱稱係傳媒畀，好多人都叫我BB。希望大家唔好為小事煩惱，呢個世界充滿愛。」

就係咁嘅，事緣前日頒獎禮當晚，鍾嘉欣封視后一說已經高唱入雲，連盛傳疊埋心水唔續約嘅楊怡都本住「陪坐」姿態戥人高興；投自己一票嘅《巨輪》田蕊妮就更加對自己冇信心。咁又係，一來唔係親生女，二來係對台過檔，對某啲高層而言，都係嘉欣BB「抵錫」啲。但最後賽果，係田蕊妮封雙料視后，無論係所謂807人組成嘅專業評審團定係民選都好，田蕊妮兩邊都贏。

咁，唔通秋生要為嘉欣BB失落視后而道歉？唔係，佢係話，如果當晚佢頒視后之前嘅一番言論令嘉欣BB或者佢嘅fans唔舒服，佢會道歉。

秋生當晚講咗啲咩呢？佢先係話，呢最後五強，佢由細睇到大(秋生係話:「呢幾個，都係我睇佢嘅戲大嘅。」)，然後逐個講喇:「陳法拉，我梗係睇佢嘅戲大，但陳法拉今日好似冇嚟。如果冇嚟都攞到嘅話，

咁TVB就真係非常之……掂喇。鍾嘉欣……鍾嘉欣……嘩，幾廿歲都叫BB，我唔敢話睇佢嘅戲大呀呢個。徐子珊，嘩徐子珊呢個犀利喇，真係，唔睇佢戲都大呀。

楊怡，楊怡呢個，就全香港嘅男人都睇佢戲就大0架啦。42吋胸，男神呀呢度寫。田蕊妮，我一定睇佢嘅戲大，唔信你問你老公，我睇你嘅戲大0架。拿，如果咁多人揀，我一定揀你。」就係呢句「幾廿歲都叫BB」，令嘉欣BB 嘅fans好唔舒服，又出動人海戰術鬧爆秋生。

其實呢，嘉欣BB嘅fans都係將偶像失獎嘅怒氣，發洩埋喺秋生身上，而且個個候選人都急不及待喺微博抒發心聲話點點點，江美儀直頭將你個微博由底洗版洗到上面再洗番落底，洗到你嗌救命，係得大熱倒灶嘅嘉欣BB遲遲唔講嘢，等到差唔到24小時後先至連發PO俾fans話:「粉絲們:No words can express how grateful I am to have good fans like you guys. 你們對我的支持、付出，真的令我深深感動！

謝謝你們，辛苦你們，漏夜整支持牌給我，大風大雨去排隊，在外面等我. I will keep trying my best in all my works to repay! But as for now, plz take good care!」好感動。