巴士惡女起底

拖篋惡女喪鬧長者短片網上熱爆！近日互聯網瘋傳一段短片，內容是一女子拖行李篋佔用巴士關愛座位，與鄰座老婦疑因碰撞口角，有人鬧老婦：「你估你係長者大晒呀？我遲啲都係長者啦……」有女乘客不值女子所為出言勸阻，反被喝罵：「關你叉事呀，死八婆！」片段曝光後惹來網民熱議，號召「人肉起底」，一面倒斥責惡女，「個天會畀機會佢做長者咩？呢啲人應該拎去火化……」

該段長五十九秒、名為「巴士惡女鬧爆老人家」的短片，前日上載即瘋傳，有網民昨晚即時「人肉起底」，聲稱惡女姓鄭。據拍片女乘客在網上聲稱，剛才乘搭一輛9號線巴士，一名坐在近走廊關愛座、拖着行李篋的女子（三十餘歲），起身移開行李篋讓老婦（六十餘歲）入座，當她坐回座位時，突然將篋「質」落老婦的腳部，雙方為此口角，惡女向老婦連珠發炮：「咁依家咪畀你坐囉，我有無話唔畀你坐先，你要結果啫嗎，你拗個過程做乜啫，依家我有無話唔畀你坐先，你收聲啦，你報警好無呀？黐孖筋……」

老婦聞言反駁：「你報囉！」兩人繼續你一言、我一語互罵，惡女自恃「聲大大」佔上風，繼續狂噴：「你一係報警啦，黐孖筋，好無呀，你報囉，你嘈乜啫，我有大把時間同你玩，我無撞到你，如果有，你就報警！」老婦無奈：「咁你去報啦！」

「長者就大晒呀」

此時，車上一名男乘客介入勸喻：「坐幾個站啫，算啦，唔好嘈！」不過惡女毫不理會：「你叫佢收聲，我咪唔嘈囉，我又唔係唔畀佢坐，你估你大晒呀，長者就大晒呀，我遲啲都係長者啦……」惡女又對着老婦破口大罵：「你都黐線，你係咪仲要拗啫，你收聲啦！」老婦不甘捱罵反駁：「你點解唔收聲？」惟惡女愈鬧愈過癮：「我依家咪畀你坐囉，你仲想點呀？」

拍片女乘客質疑惡女不應坐在關愛座，反被惡女指摘多事：「我有個篋呀，你唔好出聲啦，你落車，關你叉事咩，你報警啦，走啦，你行開啦！」女乘客忍無可忍，出言斥責惡女：「畀老人家坐o架，死八婆！」惡女也報以「死八婆」回應。拍片女乘客事後在網上留言：「如果唔係要落車，我實同佢開戰鬧過，真係未見過D咁嘅人！」
「影衰晒香港人」

短片曝光後，多個討論區及facebook群組即有網民洗版，一面倒留言直斥惡女「無品」，口出狂言欺負長者，「影衰晒香港人」。其中網民Man Lee留言：「有個篋就變長者，我哋去攞多幾個篋就可以攞番強積金啦！」網民Raymond Szeto亦留言：「阿婆錯晒都好，幼稚園都已經教尊敬老人家，禮讓！」

新巴發言人表示，由於短片內的巴士，車內設備與旗下巴士並不相符，否認事件與公司有關；九巴發言人回應指出，未能從片段中了解事件的性質及詳情。