陳果曾經有「九七三部曲」——《香港製造》、《去年烟花特别多》同《細路祥》，今次《那夜凌晨》開宗明義有政治投射，不少網民話:「就算係爛尾，都要入場支持!」只可惜香港嘅觀眾要等到年中先有得睇。早前《那夜凌晨》先後出過兩條預告，唔夠喉，幸而啱啱喺網上又再流出多一條電影片段，今次條片就唔係好似之前兩條咁係預告片，而係電影入面嘅其中一段，仲有好多對白0添。
呢part係講大家開始發現四圍冇晒人，個個開始打電話，但就打唔通，飾演小巴司機嘅林雪就用好地道嘅粗口叫大家落車，但就冇人夠膽落。任達華演嘅發叔就第一個起身，成個大佬咁款做leader，而李璨琛飾演嘅白粉佬都入型入格。
陳果話呢套電影係拍畀香港人嘅電影，故此對白句句精警，好似徐天佑喺片段入面講咗句：「大家無謂再呃自己話出面一切係正常，我諗，大家係時候停一停，面對我哋見到嘅現實。」嘩，單單係呢一句，已經中晒香港人要面對嘅政治現實。
