親建制組織「愛護香港力量」（愛港力）近日又惹是非，有網民噚日喺愛港力嘅facebook公開專頁貼咗一張惡搞圖，話學民思潮召集人黃之鋒（Joshua）係恐怖分子，仲將Joshua張相同其他內地恐怖分子放埋一齊「通緝」，又話Joshua係輕度弱智，而且作大指佢有「非禮老婦同女童」嘅紀錄，講到Joshua係十惡不赦嘅終極壞蛋咁。
之鋒：攻擊勁過官媒
Joshua噚日喺自己fb專頁轉貼呢幅惡搞圖。佢同Emily講，呢啲指控完全係抹黑同人身攻擊，話佢有非禮紀錄更係揑造事實。Joshua話呢種人身攻擊仲勁過親中報章對佢嘅攻擊。不過，Joshua嘅EQ都算高，睇完無特別唔開心。
Joshua話，相信好多市民透過呢件事，都分辨得到支持同反對國民教育嘅人，質素上有啲咩嘢分別。佢話，如果支持國民教育嘅人都係呢種質素嘅話，佢會好失望。大批網民見到呢張惡搞圖都義憤填膺，留言支持Joshua，仲話事件涉及誹謗，建議Joshua採取法律行動，Joshua就話會考慮喎。
Emily打咗畀同愛港力關係密切嘅九龍城區議員左匯雄，佢急急同愛港力劃清界線，話自己唔係愛港力成員，仲話呢種人身攻擊嘅行為唔啱，佢都唔會同意。
